Kaixo!
Biosferak, Butroi Bizirik Trantsizioan elkartearen ingurumen taldeak, beti biodibertsitate galeraren kezka izan du. Hori dela eta, hainbat ekimen bultzatzen ditu bertako biodibertsitatea zertan datzan ezagutzeko eta babesteko. Orain gure azken ekimenaren berri eman nahi dugu.
Oso ezaguna da udaberri aldean, beste txori asko bezala, Afrikatik datorren kuku txoria. Ezagutzen dugu kantuagatik, zeren eta nahiz eta nahiko txori handia izan, ez dugu sarritan aukera izaten ikusteko. Hala ere, gaur egun bere kantua ere gero eta gutxiagotan entzuten dugu. Beraz, ekimen erraz honetan, jendeari zera eskatu nahi diogu: Bizkaian kukua ikusten edo entzuten duenean gure kukubbt@gmail.com helbidera mezu bat bidal dezala noiz eta non entzuten duen adieraziz.
Ekimen honek bi helburu ditu. Alde batetik, kukuaren populazioaren inguruko daturen bat izatea. Eta beste alde batetik, jendearen ingurumenarekiko interesa piztea. Gure ustez ekimen honetan edonork parte har dezake. Egia esan, herritar zientzia honek ez du ordezkatzen biologoen lana baina lagungarri izango da.
Beraz, “Kuku!!!” entzun eta guri mezu bat bidali. Eta mesedez ekimen honen berri eman. Zenbat eta jende gehiagok parte hartu orduan eta informazio zehatzagoa izango dugu.
Eskerrik asko, eta ez ahaztu, beti izan patrikan txanponen bat!